Blefarit nədir? Əlamətləri, səbəbləri və müalicəsi

Blefarit nədir?
Blefarit — göz qapaqlarının kənar hissəsinin iltihabıdır. Əsas törədiciləri Staphylococcus aureus, Demodex gənəsi, uşaqlarda isə Staphylococcus epidermidis sayılır.

Sadə blefarit zamanı göz qapağı kənarları qızarır, qalınlaşır, kirpik kökcüklərində kül rəngli pulcuqlar əmələ gəlir.
Xoralı blefarit zamanı irinli yaralar müşahidə olunur.
Meybomi blefariti isə piy vəzilərinin iltihabı və disfunksiyası nəticəsində yaranır — göz qapaqları qalınlaşır, sıxıldıqda ağ rəngli piyli sekret ifraz olunur.

Blefaritlər çox zaman xroniki formada uzun müddət davam edir.

Səbəbləri:

• Uzunmüddətli infeksiyalar və immunitetin zəifləməsi

• Mədə-bağırsaq sistemi xəstəlikləri

• Gigiyenik qaydalara əməl etməmək

• Vitamin çatışmazlığı

Əlamətləri:

• Gözlərdə qaşınma və yorğunluq

• Qapaqlarda ağırlıq, şişkinlik, qızartı

• Pulcuqlanma, kəpək, işığa həssaslıq

• Kirpiklərin qeyri-düzgün bitməsi və ya tökülməsi

Blefarit diaqnozu oftalmoloji baxış və mikroskopiya ilə qoyulur. Bəzən əlavə laborator analizlər (kirpik kökcüklərində Demodex aşkarlanması) tələb oluna bilər.
Müalicə üçün həkimə vaxtında müraciət vacibdir, çünki blefarit çox vaxt sistem xəstəliklərinin əlaməti ola bilər.

Müəllif: Dr. Leyla Əlizadə, oftalmoloq, SƏHHƏT klinikası